لو نخيت ام البنين كَول هاي ام اليقين
عدهه بيبان اربعه
باب يم المشرعه
والثلاثه الطيبين كَول هاي ام اليقين
................
تنحني اجلال لأديهه كل رؤوس اهل الوفه
البيهه شجره من المعارف تعتنيهه المعرفه
يا مطر يوصل ضفافه لو دمعهه تذرفه
ما نوصف دمع منهه انخلي غيمه توصفه
وبالسمه بوقت المساء ... اشكَد اسمهه بالدعاء
ومايرد كلمن دَعَه
باب يم المشرعه
والثلاثه الطيبين كَول هاي ام اليقين
.......................
هذي من عصرت كَلبهه للحسين بأربعه
ثلاثه طاحو عالوطيه وواحد اعلى المشرعه
دون ابو السجاد راحو والهه رادت منفعه
يرجعلهه حسين سالم ماكو اي شي ايصدعه
والكرامه بهالعمل .... صارت من اهل الأمل
والنخاهه بمدمعه
باب يم المشرعه
والثلاثه الطيبين كَول هاي ام اليقين
........................
طاهره وحيدر خذاهه من صناديد الزلم
كلهه طاعه للأمامه وكلهه يم زينب عزم
لليتامه اتغيرْ اسمهه ما يحسون ابيِتم
وعلمت عباس يسكَي أهله بالماي الشهم
وابأسمهه المعجزات .... هاي ام التضحيات
والدليل وموضعه
باب يم المشرعه
والثلاثه الطيبين كَول هاي ام اليقين
...................
ترجمت معنى الامومه وربت انجوم وكَمر
مو على الاربعه خلصت لا على حسين السهر
جان بالطف كل علمهه تعرف بهذا القدر
اربعه ضمت ضناهه للطفوف بكل فخر
وباب صارت للكرم .... هيه وي راعي العلم
وعالشريعه مصرعه
باب يم المشرعه
والثلاثه الطيبين كَول هاي ام اليقين
.........................
من رجع ناعي المصيبه وبأهل يثرب خطب
حسين ذبحو بالمدينه يم فرات وما شرب
سألته بعبره وفجيعه عنه وبحسره وتعب
شلون يرحل واني لجله امضحيه بولادي اشعجب
وكون ابو الاكبر غفه ..... اي على الدنيا العفه
صاحت وما ودِعه
باب يم المشرعه
والثلاثه الطيبين كَول هاي ام اليقين

... ياسر العارضي .

يحسين الك بالروح جمرة بواجي
يل بالدمع وياك تحله المحاجي
احنه الموالين
ياساكن العين
يل بالدمع وياك تحله المحاجي
.......
هذا البجي المملوح مثل السوالف
هوه اليترجم ريت كل المواقف
تدري ابحزنه عليك ميوصفه واصف
وعدنه الدمع مولاي مالحظه ناشف
يمشيد الدين
ياساكن العين
يل بالدمع وياك تحله المحاجي
.......
تحضرنه وانت بهاي يالغالي تدري
بصوت النواعي انذوب والعبره تجري
جلمة الك يحسين كل هذا عمري
واحدنه يامولاي بنفاسه تسري
يابو الميامين
ياساكن العين
يل بالدمع وياك تحله المحاجي
.......
عالظهر بالزنجيل نترك علامه
هذا العمل مذخور يوم القيامه
كل ضربه بي والله بيهه السلامه
من ربنه واهل البيت هاي الكرامه
واحلى العناوين
ياساكن العين
يل بالدمع وياك تحله المحاجي
.......
يحله اللطم لحسين بي معنه واضح
بي ننصر المظلوم والحقه رايح
ومانخشه لجل الدين هاي المذابح
ومبينه احنه احرار من الملامح
وزلم الميادين
ياساكن العين
يل بالدمع وياك تحله المحاجي
.......
دارت رحه الايام وانعادت اطفوف
والخدمه كَام اتجيب آلاف الألوف
متعني الك ويموت للمرقد ازحوف
بالحشر كلبه اهناك مايعرف الخوف
ذوله المجانين
ياساكن العين
يل بالدمع وياك تحله المحاجي


الشاعر ياسر العارضي